Sorkarin sum a pe a, DC-ten project an thawk zo zel tur a ni : AP CM

Arunachal Pradesh chief minister Pema Khandu chuan state chhunga deputy commissioner hrang hrangte chu an district ṭheuha state sorkarin development project a thawhte a neitu nihna rilru pu, sum pekte dik taka hmang a, hun tiam chhunga project tinte thawh zawh a nih zel theihna tura hma la turin a hriattir.

Chief Minister Khandu hian thla tina e-Pragati review meeting an neih ṭhin chu Ningani khan virtual mode hmangin a nei leh a, meeting-ah state chhunga deputy commissioner-te an tel vek a ni.

Khandu chuan tun hnaia East Kameng district a tlawhnaa road project pahnih chungchang pawh sawi chhuakin, heng project-te hi harsatna hrang hrang awm vangin zawhfel an la ni lo a, hei hi tualchhung miten an tuar nasa a ni, a ti. Project thawh ṭantirh aṭangin district thuneitute chuan neitu nihna rilru tak tak pu ni ta se, tuna harsatna an tawh ang chu a thleng kher lo tiin a sawi.

Deputy commissioner-te pawimawhnate sawiin, an district chhunga development project thawh hrang hrangte pawh an kutah a awm a ni tiin, "Sorkarin project thawhna atan sum a pe a, heng project-te thawh zawh a nih theihna tura mawhphurhna chu deputy commissioner-te kutah a awm a ni," a ti. DC tinte chu theihtawp chhuaha hna thawk a, an huam chhunga project thawh mekte hmasawn dante pawh hriattir zel turin a chah bawk.