Assam Congress-in CAA dodalna lantir leh dawn

Assam Pradesh Congress Committee (APCC) chuan sawisel hlawh tak, Citizenship Amendment Act (CAA) an dodal chungchangah an dinna a la ngai reng tih sawiin, state chhunga indigenous group leh regional party hrang hrangte an biak hnuah, CAA dodalna hi lantir leh an tum.

APCC president Bhupen Kumar Borah chuan CAA hi an pawm thei ngai dawn lo tih sawiin, he dan hi society ṭhendarhna tur, nakin zela an state tana thil ṭha lo tak tur a ni tih a sawi.

"A huhoa CAA dodalna lantir lehna turin indigenous group-te pawh kan be mek a ni. Parliament-ah emaw, kawtthlerah emaw pawh ni se, state leh state mipuite tana beiin, he dan sut leh tur hian rorellai party chu kan nawr leh dawn a ni," a ti.

Assam mipui tam zawkin CAA hi an duh lo tih sawiin, APCC president chuan dodalna an lantir lehna tura pawh party leh group hrang hrangten an thlawp a rin thu a sawi.