Tripura-ah thu dik lo thehdarh ṭhat loh thu campaign tu that

Tripura Information and Culture department in state chhunga thu dik lo lengvak leh thehdarh ṭhat lohna kawnga campaign nei tura an chhawr, Sukanta Chakraborty chu kar kalta Ningani zan rei tawhah khan mipuiin an sawisa hlum.

Tripura police official-te chuan campaign tura a kalna chhan ber, thu dik lo leng ṭhin vang bawka thah a nih an rin thu an sawi a, chhan dang vang pawh a ni thei niin an sawi bawk.

Assistant Inspector General of Police, Smriti Ranjan Das chuan Chakraborty(33) hi mipuiin Kalachhara-ah a lirthei an lo bei tih a sawi a, Sabroom aṭanga a lo let leh lam lo beih a ni tih a sawi bawk. A nunna hial a chan bakah a driver pawh nasa taka sawisak a ni a, mahse a driver hi chu hliam na tak tuar chungin a insaseng thei a ni, a ti.

Tunlaiin thu dik lo thehdarh avangin mipuiin an sawisak hlum thu hriat tur a awm zeuh zeuh a, Ningani liamta tho khan, chawhnu lamah naupang ruk bo tum emaw tih avangin mipuiin Uttar Pradesh mi Zahir Khan an sawisa hlum tawh bawk.

Sepahijhala district-a Bisha­lgarh-ah pawh naupang ruk bo ching emaw tih vang bawk hian rualbanlo nu pakhat sawisak hlum a lo ni tawh bawk a ni.

Tripura Director General of Police A.K. Shukha chuan Zir­tawpni kha thu dik lo darh zel venna atan hian SMS leh mo­bile internet service chu Inrinni chawhnu dar hnih thleng khan block turin a lo ngen tawh a ni.

Chief Minister Biplab Deb chuan naupang rukbo ching an awm nia thuthang awm lakah fimkhur turin mipuite chu a chah a, CPI(M) in Tripura BJP hmel tihchhiat tuma an thu thehdarh mai a nih thu a sawi.

Hetihlai hian Chief Minister hlui Manik Sarkar chuan Police leh civil thuneitute chu fimkhur tura chahin, mi thiam zawk te chu hma la turin a chah bawk.

BJP chuan CPI(M) chu hetiang thu dik lo thehdarh tuah hian puh mah se CPI(M) leh Congress chuan naupang kum 11 mi thah a nih danah BJP in thu dik lo an thehdarh avanga heng thihna te hi thleng a nih thu an sawi ve thung a ni.