AP sorkar in Toko Yame case CBI kutah dah

Arunachal Pradesh sorkar chuan Toko Yame thih­na thubuai chhui hna chu Central Bureau of Inves­tigation (CBI) kutah an hlan.

Yame hi Government Higher Secondary School, Tawang-a pawl 12 zirlai a ni a, nikum September 16-a an school leh Jawahar Navodaya Vidyalaya (JNV) inkara buaina a chhuah hnu lawkah a bo zui a ni. Hemi hnu Septermber 23 khan a ruang ṭawih nasa tawh tak chu JNV bula Biga tuikhawhthla bulah chhar a ni leh a ni.

Yame thih chung­changah hian Special Investigation Team(SIT) te pawh din niin mi 20 chu man an ni hman a, mahse heng an mi man te hi chhuah leh vek an ni thung.

Thla kua lai liam tawha thil thlengah hian mawhphurtu chhuichhuah an la nih loh avang leh sorkar in hma a la ṭha tawk lo nia hriat avangin mi tam takin tunhnaiah sorkar an nawr nasa hle a, zirlai pawl hrang hrang, All Arunachal Pradesh Students’ Union (AAPSU) leh Arunachal PCC-te pawhin he case hi CBI kuta dah turin sorkar nasa takin an nawr a ni.

Zirtawpni-a chief minister office thuchhuah chuan Toko Yame case chu sorkar in a ngaihpawimawh thu thuchhuah siamin mipuite pawhin he case chhuichiang tur hian nasa taka an nawr thu an sawi a, hemi a nih avang hian sorkar chuan Yame case hi CBI kuta dah turin thu­tlukna a siam ta a ni, a ti.