AP CM in Anti-Conversion Law Ṭhiat tura rawtna a siam in titi ti tam

Arunachal Pradesh Chief Minister Pema Khandu-an kar hmasa Ningani-a sakhaw danga inleh khapna, Arunachal Pradesh Freedom of Religion Act/Anti-Conversion Law ṭhiah tura rua­hmanna a awm thu a sawi chuan state chhungah titi a ti tam hle a, mi tam takin mak an ti hle bawk.

Arunachal Pradesh Free­dom of Religion Act/Anti-Conversion Law hi 1978-a pawm a ni. BJP kaihhruai sorkar in he dan hlih tuma hma an lakna hian mak tih a hlawh hle.

Pema Khandu chuan he dan hian sakhaw zalenna a tibuai nia sawiin Kristian-te a tinzawn bik tih a sawi. Assembly leh hunah chuan he dan hi hlih a nih theih nan pharh a ni ngei dawn tih a sawi bawk.

Khandu chuan he dan hi a ni lo zawnga hman chuan tharum thawhna a thlen thei tih sawiin Arunachal Pradesh chu a tidarh vek thei tih a sawi bawk a ni.

Chief Minister hian kar hmasa Ningani-a Itanagar-a Banderdewa Biak ina Prem Milan hun a hmanpuinaa thu a sawinaah a sawi a ni a, he program hi Arunachal Pradesh Catholic Association in an buatsaih a ni nghe nghe.

Hetih lai hian BJP hruaitu tam tak chuan hemi chungchangah hian engmah an sawi duh lo tih report ṭhenkhat chuan an tarlang.

Kristian te an lawm

Tunhnai kum eng emaw zat chhung hian Arunachal-ah hian Kristian hi an pung nasa hle a, 2011 chhiarpuia a lan dan chuan Kristian hi mi nuai 13, 30.26% an awm a, 2001-ah kha chuan 18.7% chiah an awm a ni. 1951 kumah khan Arunachal Pradesh-ah hian Kristian pakhat mah an awm lo thung.

BJP sorkar in Arunachal Pradesh Freedom of Religion Act/Anti-Conversion Law 1978 ṭhiah a tum avang hian state chhunga Kristian te chu an lawm hle a, social media lamah pawh lawmawm an tih thu an sawi nasa hle a ni.

Hetih lai hian mi ṭhenkhat chuan BJP hian he dan hi a ṭhiat a nih chuan state chhunga Kristian awm zawng zawng, 32% vote chu an hui theih dawn vang niin an sawi thung a, BJP hian Kristian te tih lawm an tumna mai niin an sawi ve thung.

Mahse Arunachal Christian Forum chuan BJP hian hemi chungchangah hian politics an inrawlh tir lo tih an sawi ve thung a ni. Forum chuan politics nen inhnamhnawihna a nei lo tih sawiin Arunachal Kristian te chuan ṭha an tih ber an vote mai ṭhin niin a sawi. Chutiang chu ni lo se, (MoS Home) Kiren Rijiju chuan Lok Sabha-ah a zawnin term hnih a chelh lo ang a ti ve thung. Rijiju hi Kristian tamna constituency aṭanga thlan tlin a nih thu an sawi bawk.