Manipur University HOD pasarih bang Vice Chancellor ban an phut

Manipur University buaina kal zelah Univeristy Vice Chancellor ban phut vangin Deaprtment pasarih Head of Department-te chuan Inrinni khan an hna aṭanga an ban thu an sawi.

Manipur Univeristy VC Adya Prasad Pandey ban phut hian Pathianni khan Manipur University Students Union (MUSU), Manipur University Tea­chers Association (MUTA), Manipur University Staffs Association leh zirlai pawl dang ṭhenkhat te chu university main gate bul, Canchipur till Kakwa bulah an pungkhawm leh a ni.

MUTA president, Prof. I. Tomba chuan MUSU chu an thlawp thu sawiin VC ban an duh thu a sawi a, he buaina hi a punlun tak tak hma khan VC chuan zirlaite zawhna leh buaina hi a chingfel duh lo a ni, a ti.

Tomba chuan a hma chuan inbiakna pangngai hmanga zirlai te leh VC inkar buaina hi chinfel an beisei thu sawiin VC hnenah pawh zirlaite inbiakna neihpui tura an ngen thu a sawi. Mahse VC AP PAndey chuan an ngenna chu a hnawl tak si avangin MUSU chu an thlawp ta tih a sawi bawk.

MUTA Presidnet chuan university buaina avang hian Chief Minister, governor leh HRD Ministry joint secretary pawh an hmu tawh tih a sawi a ni.

MUSU president, Ma­yanglambam Dayaman chuan punkhawm an huai­hawt chhan chu thuneitu lamin an beng an chhut ngawn tlat vang tih a sawi a, thuneitu lam an ngawi tlat chu mak a tih thu a sawi.

Dayaman chuan an thil phut tihhlawhtlin a nih hma chuan nawrh an chhunzawm zel dawn thu a sawi a ni.