Manipur zirlaiten MU VC lim/lem mitthi hal angin halral Department Head 28 bang tawh

Manipur University Stu­dents Union (MUSU) chuan Thawhṭanni khan Manipur University Vice-Chancellor Adya Prasad lim/lem an siamchawp chu mitthi ruang halral angin an hal ral.

Hei hi MUSU ten Uni­versity vice-chacellor ban phuta nawrh an huaihawtna kawng khat a ni.

Hetihlai hian Department 32 awm zinga department head 28 chuan an ban thu an sawi tawh bawk a, Pandey chhuak tura nawrna hi an thlawp thu an sawi. Department head zinga an ban thu la sawi lo, mi pali te hi chu hmundangah an awm nia tarlan a ni.

MUSU president M. Daya­man chuan an thil ngiat chuan thla a tlin tawh thu sawiin, thuneitu lam erawh an la ngawih tlat thu a sawi. Thuneitu lam chu Vice Chacellor lamah an ṭang tih sawiin, zirlaite hmalam hun leh nun chu an ngaihtuah lo a ni, a ti.

Dayman chuan Pandey chu a hna aṭanga ban emaw, sawn emaw a nih hma chuan an nawrh chu an chhunzawm zel dawn tih a sawi bawk. Hemi a nih avang hian Pandey lem/lim chu ruang halral anga an halral thu sawiin an thil dik lo tih te chu a lo tawp tawh nan leh university-ah boruak muanawm tak a awm theih nana ti an nih thu a sawi a ni.

MUSU president chuan Chief Minister N. Biren Singh pawh vawihnih lai an hmuh tawh thu sawiin hmalakna engmah a la nei lo tih an sawi a, state sorkar emaw BJP emaw pawhin engmah hmalakna an la nei lo tih a sawi. Hemi anih avang hian an dem thu sawiin state mai bakah sorkar laipuiah pawh BJP chu thuneitu an nih laia hma an la lo chu an dem thu a sawi a ni.

Thawhṭanni vek khan Manipur University Teachers’ Association (MUTA) pawhin department head tam zawk an ban avangin emergency meeting an ko nghal a, zirlai pawl te chu an thlawp thu an sawi bawk. An thil phut tihhlawhtlinna tur hian Prime Minister, HRD Minister, Chief Minister leh Chief rector-te hma la tura ngen an tum thu an sawi bawk.

Manipur University hnuaiah hian institution 86 vel affiliate an awm a ni.