Nagaland: NDPP in CM Rio thlavang hauh

Nagaland Chief Minister Neiphiu Rio-an Naga inpum­khatna chungchanga a thu­sawi avangin inhnialna a tam hle a, hei vang hian rorel lai Nationalist Democratic Prog­ressive Party (NDPP) chuan Thawhṭanni khan thuchhuah siamin CM thlavang an hauh.

Union home minister Rajnath Singh leh Central official-te June 12-a meeting a neihpui hnu lawkah Neiphiu Rio hian tun dinhmunah chuan Naga area inpumkhatna siam chu thil harsa tak a nih thu a sawi a ni.

National Socialist Council of Nagalim (Isak-Muivah) chuan Pathianni khan Rio thusawi chu thil awm ang lo tak a nih thu leh mawhphurhna hlen loh thlak nia sawiin Naga hnam inpumkhatna tur ualau taka dodalna a ni, an ti.

NDPP chuan Thawhṭanni khan thuchhuah siam ve nghalin Rio chuan Naga inpumkhatna turin a theihtawp a chhuah a, sorkar laipui lamin tun dinhmunah chuan Naga awmna chin sawikhawm chu a harsa an tih thu a sawina a nih thu an sawi. Hemi anih avang hian ama mimal ngaihdan pawh ni lo in an party ngaihdan pawh a nih loh thu an sawi.