Covid-19 : Hmarchhak dinhmun

Arunachal Pradesh-ah Covid-19 kai hmuh chhuah mi 80 an awm tawh. 

Hri kai hmuh tawh zinga pali chu enkawl dam an ni tawh a, mi 76 enkawl mek an la ni. An zingah dinhmun ngaihtuahawm an awm lo. AP-a hri kai hmuh zingah hian Indian Army-a sipai pathum an tel.

Hri kai enkawl mek zinga 48 chu Changlang district mi an ni a, East Siang district-ah mi pakua, Namsai leh West Kameng-ah mi pathum ve ve, Lohit-ah mi pahnih leh; Lower Dibang Valley, Tawang, Upper Siang,Tirap, Longding leh West Siang district-ah mi pakhat ṭheuh an awm bawk. 

Assam-ah hri kai mi 3,900 hmuh chhuah an ni tawh a, an zinga 2,084 chu enkawl mek an ni. Inrinni khan hri kai enkawl zinga mi 221 chu an sample a negative tawh avangin damdawiin aṭangin chhuahtir an ni. 

Assam sorkar chuan an state-ah hri kai an pun belh zel avang leh, hri kai hmuh chhuah zinga mi 25 chu hmun danga zinna nei lo, Guwahati-a awm reng an nih avangin hri hi mipuiah a darh tawh em tih enfiah a, test tam zawk neih a tum. Kar leh aṭangin khawpuia cheng mi 50,000 chu Covid-19 test neihsak an ni ang. 

State sorkar chuan Guwahati-a thlawhtheihna lut leh chhuak pawh ni khatah 25 chinah a bithliah. Interstate truck parking lot leh essential service atana warehouse hmante chu quarantine zone-ah hman tel nghal a nih tur thu health minister Himanta Biswa Sarma chuan a sawi. 

Sarma chuan khawpui chhungah zin chhuahna  nei lo hri kai hmuh chhuah belh zel an nih chuan, Guwahati-ah total lockdown kalpui pawh a ngai leh mai thei tih a sawi bawk. Test runpui neiha result 

aṭangin hma lak dan tur chu a hriat theih dawn tih a sawi bawk. Hemi atan hian naktuk aṭangin khawpui chhunga hospital 12-ah COVID-19 testing centre hi an nei dawn a ni.

Kar liam ta Inrinni thleng khan Assam hian sample 2,01,503 a test tawh a, hengte hi RT-PCR khawla test vek an ni. State sorkar chuan June 30-ah mi nuai thum test hman a tum.  

Manipur-ah hri kai hmuh chhuah thar  39 awmin, Covid-19 kai hmuh tawh hi mi 458 an tling tawh a ni. 

Hri kai hmuh tawh zinga mi 89 enkawl dam an ni tawh a, enkawl lai mi 369 an awm mek a ni. 

Chief minister N Biren Singh chuan hri kai pun chhan pakhat chu quarantine centre hrang hrangah guideline siamte an zawm ṭhat loh vang a nih thu a sawi. Hri darh tur venna atana sorkarin dan a siamte zawm ṭha lo chu jail-ah dah zel an ni dawn tih sawiin, mi pariat chu quarantine centre chhungah harsatna siam zawnga awm a, dan an bawhchhiat avangin jail-ah dah an ni tawh tih a sawi bawk. 

Meghalaya-ah June 10 aṭang khan hri kai hmuh chhuah belh an awm lo a, hri kai enkawl mek zinga mi pathum chu enkawl dam damdawiin aṭangin chhuahtir an ni tih nimin khan chief minister Conrad K Sangma chuan a sawi. 

Meghalaya-ah hian hri kai hmuh chhuah hi mi 44 an awm a, an zinga pakhatin a thihpui a ni. Hri kai zinga mi 26 chu enkawl dam ni tawhin, enkawl mek mi 17 an la awm. 

District 11 zingah East Garo Hills, East Jaintia Hills leh South West Khasi Hills-ah Covid-19 kai hmuh an awm lo tih official-te chuan an sawi bawk. 

Nagaland-a Covid-19 kai hmuh chhuah mi 168 an tling tawh. 

Hri kai enkawl mek zinga mi 27 chu Inrinni khan an result a negative tawh a, anni nen hian enkawl dam hi mi 76 an awm tawh a ni. 

Health and family welfare department-in a tarlan danin, Nagaland-a hri kai enkawl dam, recovery rate hi 46% a ni. Enkawl mekte pawh an taksaa natna nei lo, asymptomatic vek an nih avangin ngaihtuahawm an awm lo nia sawi a ni bawk.

Nagaland-ah hian swab sample 5,945 test a ni tawh a, heng zinga 1,329 result chu  nghah mek a la ni. 

Sikkim-ah kar liam ta Zirtawpni zana swab sample test zinga mi 36 in Covid-19 an kai tih hmuh chhuah a ni a, heng mite nen hian hri kai hmuh tawh hi mi 60 an tling tawh a ni. 

Hri kai hmuh thar zinga a tam zawk hi Mumbai aṭanga haw an ni a, South leh West district-a quarantine centre-a awm mek an ni. Health department secretary Pempa T.Bhutia chuan an vai hian asymptomatic vek an ni a, damdawiina dah luh nghal niin an ngaihtuahawm lo tih a sawi. 

Inrinni khan New STNM  hospital-a enkawl lai pakhat chu a dam tawh avangin chhuah tir a ni a, hri kai enkawl dam hi mi pahnih an awm tawh a ni. 

Tripura chief minister Biplab Kumar Deb chuan Inrinni zan khan hri kai hmuh chhuah belh mi 45 an awm tih sawiin, an state-a hri kai hmuh chhuah tawh chu mi 1,081 an tling tih a sawi. 

Hetih lai hian Inrinni khan hri kai zinga mi 37 chu enkawl dam ni tahwin, damdawiin aṭangin chhuah tir an ni. Heng mite nen hian  hri kai enkawl dam tawh hi mi 277 an awm tawh. 

CM chuan hri kai hmuh chhuah tharte hi tunhnaia hmun danga zinna nei vek an ni tih a sawi.