Meghalaya-a mobile tower battery 70 vel rutu misual rual Assam-ah man
Meghalaya-a Garo Hills-a mobile tower battery 70 vel rutu misual rual chu Assam-a Boko police-ten an man.
North Garo Hills (NGH) police te chuan hun eng emaw chen aṭang tawh khan heng misual rual te hian mobile tower battery hi ruk an ching tawh tih sawiin mi pasarih vel an nih thu an sawi. Heng zinga panga te hi Boko Police-te chuan an man tawh a, an mi mante hi Meghalaya Police-te kutah hlan an nih hnuin NGH Bajengdoba police station-ah hruai an ni.
Superintendent of police, NGH, Dr Sacheng Marak chuan mobile tower battery 72 vel ruknaa mawh an phurh thu sawiin, Assam police-ten thu an zawhfiahnaah pawh mawh an phur ngei a ni tih an inpuan tawh thu a sawi.
An pawikhawihna hi Meghalaya-ah a nih avangin Meghalaya police kuta hlan an nih thu sawiin thu zawhfiah an la ni dawn tih a sawi.
Heng misual rual te hian Tura, Bajengdoba, Resubelpara, Kharkutta leh hmun dang ṭhenkhatah battery hi an ru ṭhin a, a hnuah an zuar leh ṭhin nia sawi a ni. Heng battery te hi a to hle nia sawi a ni bawk.
Assam police-te hian Thawhṭanni khan an mi man te hi Meghalaya police-te kutah hian an hlan a ni.