SC in NRC Final Draft Deadline pawtsei

Supreme Court chuan Thawhṭanni khan Assam National Register of Citizens (NRC) tarlan hun tur deadline chu thla khat dang a pawhsei sak leh a, July 30 thleng hun a pe.

Justices Ranjan Gogoi leh R.F. Nariman-te kaihhruai bench chuan NRC coordinator Pra­teek Hajela-an June 30 chuan NRC final draft hi tihchhuah hman a ni dawn lo tih a hrilh hnuah thla khat dang pawhsei a nih leh thu an sawi.

Assam-ah hian khua leh tui dik tak chhin­chhiahna, NRC hi kalpui mek a ni a, mahse ruahsur nasa leh tuilen nasat vangin hun eng emaw che hna hi chhunzawm theih a ni lo a, sorkar hruaitute pawhin June thla chhung chuah peihfel hman a nih an beisei loh thu an lo sawi fo tawh a ni.

Court chuan chief secretary leh DGP chu NRC coordinator Prateek Hajela ṭanpui turin thu a pe bawk a, Hajela leh a chhungkua te chu an hna ṭha taka an thawh theih nan an mamawh ang zawng zawng buaipuisak turin thu an pe bawk.

NRC draft list hmasa ber hi nikum December 31 zanlai khan tihchhuah a ni tawh a, hetah hian mi vaibelchhe 1.3 vel an awm a, mi tam tak chu list hmasaa an tel loh avang hian an mangang hle a ni.

Assam NRC hi mi vaibelchhe 3 chuangin an apply a ni. Hetihlai hian sorkar thuneitute chuan mipuite chu chiai lo tura fuihin khua leh tui diktak an nih chuan list-ah hian telh an nih ngei dawn thu an sawi.

Hetih lai hian eptu pawl leh state ṭhenawm hruaitu ṭhenkhat chuan NRC hi Assam aṭanga Assammese ṭawng hmang ve lo, Bengali mi te hnawhchhuahna tur a nih thu an sawi ve a, mahse hei hi state sorkar thuneitu te chuan thu dik lo a ni tih an sawi ve thung a ni.