Manipur pawikhawihna tura sum pek case-ah NIA in cheng nuai 40 man

National Investigation Agency (NIA) chuan Thawhṭanni khan pawi­khawihna tura sum pek case an chhuinaah Imphal Medical Institute director hlui in aṭangin sum fai cheng nuai 40 chuang an man bakah rangkachak an man bawk.

NIA hian Jawaharlal Nehru Institute of Medi­cal Sciences (JNIMS) director hlui Shyamo Singh-a in an dap naah pawisa cheng nuai 40.04 an man bakah document leh pawisa hlui(cheng 500 leh 1000 note) cheng nuai khat hu vel bakah rangkachak gram 700 an man a ni.

Shyamo Singh hi hel pawl Kangleipak Commu­nist Party (KCP)-te hnenah pawi an khawihna atan pawisa bakah ralthuam leh puak thei thil te supply ṭhina puh a nih avangin a in hi an dap a ni.

NIA hian chargesheet pahnih an file tawh a, nikum December 1 khan a hmasa zawk chu an file a, kumin May 24 khan pakhat zawk chu an file leh a ni.

Unlawful Activities (Prevention) Act and Explosive Substance Act hnuaiah Khoiram Ranjit Pori, Irungbam Sanatombi, P. Prem Kumar leh Sanabam Inaobi Singh-te rinhlelhna thu an thehlut a ni.