Nagaland NHM hnathawkten nawrh an huaihawt

National Health Mission Employees Association Na­galand (NEAN) chuan state sorkar laka an thil phut tihhlawhtlin phutin nimin aṭang khan tiam chin awm loin nawrh an huaihawt. 

Nagaland sorkarin Covid-19 dona kawnga damdawi lam thawktu  indaih lohna phuhrukna turin May thlaa, thla 12 chhung  chhawr tura a lak, general duty medical officer 27-te chu dah  ngheh zui a tum a, hei hi NEAN chuan sorkar nawrna atana hmang zuiin state NHM hnuaia thawk dangte pawh dah nghet vek turin a phut a ni. 

Health and Family Welfare Department commi­ssioner leh secretary hnena memorandum an thehluhah, NEAN president Dr Shasinlo Magh leh general secretary Kewetso Kenye-te chuan sorkar thiltih dan chuan an rilru a ti na hle tih an sawi. Sorkar chuan Covid-19 hri leng chungchanga service rules leh recruitment rules a siam tawhte bawhchhia nia sawiin, NHM hnuaia hun rei tak lo thawk tawhte harsatnate chu a ngaihsak duh lo niin an puh.