Assam Congress-in Covid vanga thi zat ennawn phût

Assam-a eptu pawl, Congress party chuan chief minister Himanta Biswa Sarma kaihhruai BJP sorkar chu an state-a Covid-19 vanga thi zat ennawn tur leh, a zat dik tak puang zar turin an phût.

Congress party hian National Disaster Managemeny Act ( NDMA) kaihhruaina anga Covid vanga thi chhungte hnenah zángnadawmna cheng nuai li ṭheuh pe turin sorkar an phut bawk a ni.

Chief Minister hnena lehkha a thawnah,, Assembly-a Leader of Opposition Debrabata Saikia chuan Covid vanga thi chhinchhiah chu enṭhat thuai a ṭul tih a sawi. Sorkar inthlahdah leh hnathawh ṭhat tawk loh avangin hripui vang hian mi tam takin nunna an chan phah a ni, a ti.

Sorkar chu hripui vanga thi zat dik tak thup ṭhenah puhin, Saikia chuan, "Covid vanga thi zat dik tak, rintlak tak an tihchhuah ngei kan phût a ni. Zángnadawmna dawng thei lo tura an hmaihte pawhin an dawn vek kan phût a ni," tiin a sawi.

Central-a BJP sorkar chuan kum 2020, March thla khan hripui vanga thi chhungte hnenah zángnadawmna, cheng nuai li pek a tum thu a sawi hnuah, hei hi ennawnin Rs 50,000 ah an tihniam leh niin Saikia chuan a sawi bawk. Mahse sorkar laipui hian hripui leng mek hi NDMA hnuaiah chhiatna thlengah a lo puan tawh avangin, he Act hnuaia hri vanga thi chhungte hi zángnadawmna cheng nuai li a pe ngei tur a ni, a ti.