Nagaland-ah International Tourism Mart buatsaih

Hmarchhak bial tana International Tourism Mart (ITM) vawi 9-na chu Inrinni liam ta khan Kohima-ah neih ṭan a ni a, vawiin thleng a awh ang.

Session hawnna hi State Banquet Hall-ah neih niin, Nagaland chief minister Neiphiu Rio chu khuallian a ni. He hun hi sorkar laipuia ministry of tourims huaihawt niin, minister of state (MoS) for tourism and defence Ajay Bhat pawhin a hmanpui a ni. Brunei, Malaysia, Myanmar, leh Vietnam palaite pawh an tel ve bawk.

He hun hi kumin September thlaa Assam-a hmarchhak bial Tourism and Culture Ministers' Conference chhunzawmna a ni a, hmarchhak biala tourism chawilar leh hmasawn theih dan turte an sawiho a ni.

Ministry of tourism-a assistant director general (IT Delhi & Events) Vibhava Tripathi chuan ITM buatsaih a nihna chhan chu hmarchhak bial chawilarna tur a nih thu sawiin, Nagaland tan pawh an thil neihte pho chhuahna hun remchang tak a pe dawn a ni, a ti.

Hmarchhak state hrang hrangte chu tourism chawilarna tura an hmalak tum dan tarlanna hun pek an ni.Tun ṭumah hian a vawi khatna atan zirlaite pualin session buatsaih a ni a, ram chhung hmun hrang hrang atangin zirlai 55 sawm an ni bawk.

Ministry chuan ITM-a telte tan hian Kisama Heritage Village, Kisama War Museum and Morungs, Khonoma Village leh Kohima World War II War Cemetery tlawhna hun a buatsaih sak bawk a ni.