Meghalaya-ah drone hmangin damdawi sem chhuak

Meghalaya-ah a vawi khatna atan West Khasi Hills district-a hmun kilkhawr zawka awm primary health centre chu drone hmangin damdawi pek a ni.

Chief minister Conrad K Sangma chuan hemi chungchang hi a twitter-ah tarlangin, hlawhtling takin a ṭum khatna atan Nongstoin atangin km 25-a hla Maweit PHC ah drone hmangin damdawi pek a ni a, minute 25 hun an hmang tih a sawi. Damdawi semna atan hian e-VTOL (Virtual take off and landing) Drone AquilaX2 an hmang.

Chief Minister chuan drone technology chuan healthcare hmalam hun pawh a thlak danglam thei dawn tih a sawi. Hmun tlawhpawh harsa zawkte pawh he project hmang hian awlsam zawkin an damdawi mamawhte pek a ni thei dawn a ni, a ti.