Manipur-a IR convoy lambun chungchangah NIA-in thubuai an ziak lut

National Investigation Agency (NIA) chuan November 13-a Manipur-a Assam Rifles convoy lambun chungchangah thubuai an ziak lut.

Assam Rifles convoy lambunnaah hian commanding officer, Col Viplav Tripathi, a nupui leh a fapa bakah sipai pali an thi a ni. He pawikhawihna thleng hi Manipur police-in an chhui hnuah, NIA kutah hian hlan a ni.

NIA hian Ministry of Home Affairs (MHA)-ah thubuai ziahluh tur chungchanga rawtna a thlen chu a lo remti hnuah thubuai hi ziahluh a ni ta a ni. Thubuai hi Unlawful Activities (Prevention) Act (UAPA) leh Indian Penal Code (IPC) hnuaia section hrang hrangah ziah luh a ni a, Manipur police-te pawhin document an neih hrang hrangte chu NIA kutah hian an hlan ang.

Manipur-a pawikhawihna thlenna hmun hi NIA team hian tunkar chhungin tlawh an tum.

People's Liberation Army (PLA) helte chuan security force beitute an nih thu an sawi tawh a ni. Manipur police-te chuan Colonel Tripathi leh a zuitute hi Myanmar ramri bul, Churachandpur area-a programme an hmang zo, an haw lam chu helho hian an lo lambun tih an sawi.