Assam: NSUI in Amit Shah lakah FIR thehlut

Congress zirlai pawl, National Students’ Union of India (NSUI) Assam unit chuan Thawhlehni khan BJP president Amit Shah chu tualthah, eiruk leh pawikhawihnaah in­hnamhnawih nia puhin Bhangagarh police station-ah FIR an thehlut.

Morigaon, Kamrup (metro), Kamrup (rural), Hojai, Nagaon leh Nalbari district NSUI unit te chu Nilaini khan Congress headquarters Raj Bhavan-ah pungkhawmin FIR-ah hian an hming an sign hlawm a, hemi hnuah hian an thehlut a ni.

Zirlai pawlte hian Amit Shah lem/lim pawh an hal bawk.

Goalpara, Dibrugarh leh Ba­rak Valley unit NSUI te pawhin an district ṭheuhah a hrangin FIR an thelut ve bawk a ni.

FIR an thehluh zawng zawng­ah hian November 26, 2005-a Sohrabuddin Sheikh thah a nih chungchang ziahlan a ni a, hetih hunlai hian Amit Shah hi Gujarat home minister a ni. He inthahnaah hian Shah hi Gujarat deputy inspector-general of police D.G. Vanzara chu Sheikh that tura thupe-ah puh a ni.

NSUI ten FIR an thehluhah hian Shah chu Gujarat-a hmei­chhe architect te privacy pal­zuatah puh a ni bawk a, khatih hunlaia Gujarat Chief Minister Narendra Modi thupekin hmeichhia ten zalenna leh privacy an neih chu palzutah an puh bawk.

Sohrabuddin case chhui tura CBI kuta hlan tu, Justice Brijgopal Harikrishna Loya, December 1, 2014-a thah a nih chungchangah pawh Amit Shah hi a bultumtuah an puh.

Hei bakah hian NSUI hian Shah hi black money, cheng vaibelchhe 745.59 chu Ahmedabad District Cooperative Bank-ah Bank director a nih laiin a deposit niin an puh bawk.

Tripura FIR: Tripura Unit NSUI pawhin Thawhlehni vek khan Amit Shah lakah hian FIR an thehlut ve bawk a, anni pawh hian black money chungchangah hian an hek ve bawk a ni.