AP: Hmeichhe naupang te hnenah sorkar in chhawmdawlna pe dawn

National Human Rights Commission chuan Thawh­lehni khan Arunachal Pradesh sorkar chu zirlai hmeichhe naupang 88 hnenah kar li chhungin cheng 5000 ṭheuh chhawmdawlna pe turin a ti.

Kasturba Gandhi Balika Vidyalaya (KGBV) school-a zirlai hmeichhe naupangte chu nikum khan an headmaster zah loa puh an nih avangin an inphelhruah tir a ni.

Commission chuan state sorkar report hian thuneitute chuan an zirlaite an humhim zo lo tih a tilang tih sawiin, hmeichhia te dikna chanvo an hum zo lo tih a sawi a. Chhuichianna chuan zirtirtute chu an thiam lo a ni tih tilang mah se state sorkar pawhin cheng 5000 ṭheuh, zirlaite hnenah hian monetary relief atan an pe tur a ni, a ti.

Nikum November thla khan Papum Pare district-a school-ah hian zirtirtu pathum chu Pawl ruk leh Pawl sarih zirlaite an school zawng zawng hmaa an inphelhruah tir avangin man a ni. Hei hi naupang te hrem nana ti an nih thu report chuan tarlangin, an headmaster an zah loh avanga hremna niin an sawi.

Zirtirtu pathum te hi bail in chhuah ni mah se pahnih hi chu education department in an service an tihtawp sak a, pakhat hi suspend a ni bawk.

Heng zirtirtute lakah hian IPC section 354 (b) (disrobing or compelling to undress) hnuaiah leh Protection of Chil­dren from Sexual Offences Act, 2012 hnuaiah thubuai ziah luh a ni.

State sorkar chuan NHRC hnenah hian heng hmeichhe 88-te hnenah hian counselling pek an nih thu an sawi.