Home Minister-in NEC meet kaihruai dawn
Union Home Minister Rajnath Singh chuan July 9-a Shillong-a North Eastern Council (NEC) 67th plenary neih tur a kaihruai dawn.
NEC meeting neih turah hian Assam, Arunachal Pradesh, Meghalaya, Mizoram, Manipur, Nagaland, Sikkim, leh Tripura Governor leh Chief Minister-te an tel dawn a ni.
June 13 khan Union cabinet chuan NEC hi Ministry of Home Affairs hnuaiah a dah a, Union Home Minister chu council ex-officio chairperson a ni a, Development of North Eastern Region (DoNER) Minister Jitender Singh chu Vice Chairman a ni.
Union cabinet-in NEC a siamṭhat hnua meeting hmasa ber neih turah hian 64th plenary neiha hma an lakna report-te pharh a ni dawn a, hei bakah hian council-in 2018-2019 atana NEC draft annual plan a siam pawh pawm a ni bawk ang.
Meeting hian hmarchhak biala infrastructure leh connectivity chungchangte sawiho a ni dawn bawk a, he hunah hian road transport and highways, railways, water resources, civil aviation, power, tourism leh human resource development ministry-a official te an tel dawn a ni.