Meghwal-an Manipur-a project enfiah

Union minister of state for water resources Arjun Ram Meghwal chuan Ningani khan Manipur tlawhin, Dollaithabi Barrage Project leh Thoubal Multipurpose Project te a enfiah.

Thoubal Multipurpose Project hnuaia Mapithel Dam siamna hmun tlawhna kalkawngah union minister hi mega dam siamin a nghawng thingtlang mi eng emaw zatin an lo hmu a, an har­satna tawh hrang hrangte an lo hrilh. Meghwal chuan an harsat tawhte chinfel sak a tiam a, a bikin chhawmdawlna pek chungchang chu a rang thei anga kalpui a tiam a ni.

Union minister hian sorkar laipui chuan hmarchhak biala project thawh hrang hrangte chu a rang thei anga zawh fel thuai a nih theih nan theihtawp a chhuah a ni, a ti. Manipur-a project a tlawh na chhan chu project thawh tihkhawtlai a nih dante, sum pek tur tihkhawtlai leh mega dam siamin harsatna a thlente dinhmun siamṭhatna tura hmalakna tikhawtlai a nih dante a hmun ngeia enfiah leh zirchian a duh vang a ni tih a sawi.

Meghwal chuan Mani­pur-a project thawh mekte chuan kawng hrang hrang - irrigation, drinking water supply, flood regulation leh power supply thlengin mipuite mamawh a phuhru thei dawn tih a sawi. Hei bakah heng project-te hi tourism sector thlengin an hlawkpui dawn a, mi tam tak eizawnna tur a siam­sak dawn tih a sawi bawk.