UN council-ah Citizenship Amendment Bill duh lohna sawichhuak

Citizenship Amendment Bill 2016 chu hmarchhak hmun hrang hrangah dodal a ni a, pawl hrang hrang pawhin he bill hi an duh loa, Joint Parliamentary Committee-in hmarchhak bial an tlawh ṭum pawhin an duh lohna hi an lo lantir tawh a ni.

Assam helpawl, ULFA general secretary Golap Barua-a fanu, Bonnya Barua chuan Geneva-a United Nations Human Rights Council session-ah Citizenship Amendment Bill, 2016 an duh loh thu hi a sawichhuak.

Indigenous Forum, Assam aiawha thu a sawinaah, Bonnya Barua-i chuan he bill hian Assam leilung fate dinhmun a tihnep sak dawn tih a sawi. He session-a tel tur hian UNHRC chuan Assam-a Indigenous Forum hi a sawm a ni. He forum hi Assam state-a leilung fate pawl hrang hrang 30 intel­khawm an ni a, Bonnya hi mem­ber niin a pa hi convener a ni.

UNHRC 38th session-a thu a sawiah, Bonnya-i chuan, " He bill a siam vang hian India sorkar chuan Assam leilung fate dikna chanvo humhalh sak kawngah a hlawhchham niin kan pawl chuan kan ngai a ni. He bill hian Assam mite chu hnam tenauah a siam dawn a ni", a ti. India sorkarin bill a siam tur hmang hian Assamese te chu dan loa pem lutte chim ral tura nawrh luh an ni dawn a, hetianga dan loa pemlutte avanga a leilung fate zawk ngaihthah leh nawr beh an ni hi Durban Declaration and Programme of Action kalphung kalh a ni", a ti.

India sorkar thiltih dan chuan Durban Declaration hi a ngaih pawimawh tawk lo tih a tilang nia saiwi, hemi rual hian a thil tih dik lo siamṭha tur hian hun a la nei tih a sawi bawk.