PDF-in MDA sorkar aṭanga inhnuhdawhah vau

Meghalaya-a National People's Party (NPP) kaih­hruai MDA ṭangrual sorkar siamtu zinga mi, People’s Democratic Front (PDF) chuan inhnuh­dawhah a vau.

NPP MDA pali chuan Khasi Hills Autonomous District Council (KHA­DC)-ah PDF an thlawpna hi an hnukdawk a, hei vang hian NPP chuan MDA sorkar aṭanga inhnuh­dawhah a vau let ve nghal a ni. PDF hian MLA pali neiin, an zinga pahnih chu cabinet minister an ni.

PDF chairman, PN Syiem chuan NPP nena ṭawng­kama inremna an siam­ah chuan PDF hian MDA sorkar thlawpin cabinet minister pahnih pek an ni ang a, NPP MDC-te chuan KHADC-a PDA ṭangrual sorkar cu an thlawp ang tih a nih thu a sawi. Mahse NPP MDC-te chuan PDA ṭangrual sorkar an thlawpna an hnuhdawh a vangin, anni pawhin MDA hnuaia an thawhhona chu an ngaihtuah ṭhat a ngai ta niin a sawi. Ningani zan khan hemi chungchang hi party MDC, MLA leh party hruaitu dangte chuan emergency meeting neiin an ngaihtuah nghal niin Syiem chuan a sawi.

Hetihlai hian Chief Mi­nis­ter leh NPP natio­nal president Conrad Sangma chuan district council level-a thil thleng chungchangah party state level chu a inrawlh lo niin a sawi. Council level-a thutluknate chu MDC-te kutah an dah tih a sawi.

Meghalaya Assembly-a member 60 awmnaah hian M.M Danggo (Congress) leh Agatha Sangma (NPP) te an ban hnuah member 58 awm mekin, heng zinga MLA 37 hian MDA sorkar hi an thlawp a, an zinga 19 chu NPP member an ni. Eptu party Congress chuan member 20 a nei a ni.