SC in Manipur extra-judicial Killing case-ah CBI hotu a ko

Supreme Court chuan Zirtawpni khan thuchhuah siamin CBI director Alok Kumar Verma chu Manipur extra-judicial killing case chungchangah vawiin hian Court-ah inlan turin an ti.

Hearing an neih hnuhnun bera thupek an hmuhah CBI hian extra-judicial killing case-ah hian charge sheet pali tal an thehlut tur a ni a, mahse hei hi an tihhlawhtlin loh avangin CBI director hi SC chuan a ko ta a ni.

Indian Army, Assam Rifle leh Manipur police-te chu kum 2000-2012 inkarah khan inkahna lem case 1528 an ziaklut nia puh an ni a, hemi chungchang chhui chianna hi CBI kutah dah a ni.

CBI lam chuan Zirtawpni khan case pasarih an chhuichianna chu an zawh tawh thu an sawi a, charge sheet pawh an thehlut vat theih tur thu sawiin SC lam chu hun pek belh turin an ngen a, hetih lai hian hun pek belh tura an duh

hun chhung erawh an sawlang lo.

Court chuan CBI chu Justices Madan Lokur leh U.U. Lalit-te kaihhruai bench thawhpui turin a ti a, July 27 kha heng case pasarih charge sheet thehlut tura tih an nih ni a ni a, mahse CBI lam hian hei hi an tihhlawhtlin tak loh avangin court lam hian hetiang hian thutlukna hi an siam ta a ni.

CBI aiawhtu  additional solicitor-general Maninder Singh  erawh chuan CBI lam hi chhanin charge sheet te chu hmanhmawhpui theih ngawt a nih loh thu a sawi ve thung. Case pali mai ni lo, case dang pathumah pawh chhuichianna chu an zawh tawh thu sawiin charge sheet siam tur erawh chuan tihdan hrang hrang a awm tih a sawi a, joint director level thlenga hmalakna a ngai tih a sawi.