Tripura civic body inthlanah BJP an chak

Tripura civic body inthlan, November 25-ah neihah rorellai BJP chu hneh taka thlan tlin a ni.

Inthlan neihna seat 222-a seat 217 ah BJP an chak a, CPM-in seat thum, Trinamool Congress (TMC) leh TIPRA Motha-in seat khat ve ve an la.

Civic body inthlan hi ward 51 awmna Agartala Municipal Corporation ( AMC), municipal council 13 leh nagar panchayapat parukah neih tura tih a ni a, mahse inthlan hmain rorellai BJP hi seat 112-ah chuhtu awm loin an tling nghal a ni. Hei vang hian seat 222-ah chauh inthlanna hi neih a ni.

Agartala Municipal Corporation (AMC)-a ward 51-ah BJP an chak vek a, eptu lam an awm dawn lo a ni. Member 15 awmna Khowai Municipal Council, seat 17 awmna Belonia Municipal Council, seat 15 awmna Kumarghat Municipal Council leh member pakua awmna Sabroom Nagar Panchayat-ahte seat awm zawng zawng chu BJP hian an la vek bawk.

Prime minister chuan BJP state unit-te lawmpuina hlanin, chief minister Biplab Kumar Deb kaihhruaina hnuaiah state sorkar chuan kawng hrang hrangin an state tan hma a la a, an hnathawh avangin mipuiten mal an sawm let a ni, a ti. State BJP hruaitu Karyakarta pawh theihtawp a chhuah avangin a fak bawk. Tripura mipuite chuan sorkar inrelbawlna ṭha an thlan zia a takin an tilang nia sawiin, hemi avang hian mitinte tana ṭhatna tura hna thawk nasa zual turin chakna an pe a ni, tiin PM chuan a sawi bawk a ni.

Union home minister Amit Shah pawhin Tripura mipuiten local body inthlanah BJP an thlan tlin avangin lawmthu a hrilh a, he inthlan aṭang hian mipuiten BJP-in hmasawnna tur politics a kalpui chu an rintawk zia an tilang a ni, a ti. CM Deb leh state BJP chu lawmpuina hlanin, prime minister Narendra Modi kaihhruaina hnuaiah BJP chuan state mipuite tan theihtawpin hna a thawk chhunzawm zel dawn a ni, a ti.

Kum 2018-a Tripura-a BJP in sorkarna an siam hnuah tun ṭum hi civic body inthlana BJP in an chuhna hmasa ber a ni. He inthlanah hian sorkar hmasa siamtu, CPM bakah tun hnaia Tripura lama inzarpharh tuma hma la, Trinamool Congress-te chu an khingpui berte an ni a, mahse an la inthlau hle.

Hetih lai hian TMC chuan seat khat chauh la mah se, an tan bul ṭanna ṭha tak a nih thu an sawi. TMC hruaitu Abishek Banerjee chuan, a hmaa an la luh ngai lohna state-a municipal inthlan chuh a, rorellai party in a khingpui lian bera a ngai chu hlawhtlinna pakhat a nih thu a sawi. "Thla thum pawh tling loa hma kan lak venaah hetiang dinhmun kan thleng thei a, hetih lai hian BJP chuan Tripura-a democracy tichhe turin an theihna zawng zawngin hma an la thung a ni," a ti. Inthlan chu hnawl tura an phut thu sawiin, rorellai BJP chuan an tichingpen nasa hle a ni, a ti. CPM pawhin AMC ward pangaah inthlan buatsaih ṭhat an phut bawk.

Campaign lai leh inthlan laiin politics thila intihbuaina a thleng nasa hle a, a bikin BJP leh TMC te an inbei nasa hle. TMC hruaitu leh worker eng emaw zat man an ni bawk a ni. Hei vang hian counting centre awmna hmunah pawh Tripura State Rifles leh central paramilitary force ṭhahnem tak duty tir an ni.