NPP-in CAA sut turin phût

National Democratic Alliance (NDA) hnuaia Bharatya Janata Party (BJP) thawhpui, Meghalaya-a rorellai National People's Party (NPP) chuan sorkar laipui chu Citizenship (Amendment) Act (CAA) sut turin a phut.

Pathianni khan NPP hruaitu leh Tura MP Agatha Sangma chuan sorkar laipuiin farm law pathum a siamte a sut leh dawn ang bawkin, hmarchhak bial mipuite an duh loh CAA chu sut ve turin an phut tih a sawi.

"Loneituten an dodal avangin farm law a sut a, hetiang bawk hian hmarchhak mipuite rilru hriatthiampui a, CAA hi sut ve turin kan party leh hmarchhak mipui aiawhin ka ngen a ni," tiin NDA leh a thawhpui party-ten Pathiannia meeting an neihah a sawi a ni.

Assam-ah CAA dodalna lantir dawn
Assam-a eptu party leh pawl hrang hrangte chuan December thla aṭangin CAA dodalna hi tharthawh leh an tum bawk.

Regional party, Assam Jatiya Parishad (AJP) chuan kum December 10 aṭangin ni 10 chhung CAA dodalna hi lantir an tum tih sawiin, Guwahati khawthlang lama Chhaygoan-ah nawrh huaihawt an tum thu an sawi.

Kum 2019-a CAA dodalna kawnga a hma la tur zinga mi, All Assam Students Union (AASU) pawhin CAA duh lohna an lantir chu hun eng emaw chen thawm an neih loh hnuah hma an la thar leh dawn tih an sawi. Zirlaite exam vang leh, Covid hri leng vangin anti-CAA movement pawh an kal na lo a, mahse he movement hi a la awm reng a, sorkar an nawr thar leh dawn tih an sawi a ni.