Manipur: Natna mak tak vangin bawng 19 thi tawh
Manipur-a Sebapati district-a Purul block hnuaia Thingba Khunou-ah chuan kar hmasa thleng khan natna mak tak vangin bawng 19 an thi tawh.
Heng bawng te hi an thi thut nia tarlan a ni a, an thih chhan erawh hi hriat a la ni lo thung. Veterinary department chuan bawng thi ruang te hi enfiah turin a sample an la tawh a ni. Tualchhung mite chuan heng bawng thi te hian nat lawkna an neih loh thu an sawi a, Nilaini thleng khan bawng 15 an thi tawh tih sawiin Ningani khan bawng pali dang an thi leh tih an sawi bawk. Zirtawpni thleng khan bawng thi te hi an thihchhan hriat a la ni lo a, nat lawkna pawh an nei lo niin tualchhung mite chuan an sawi.
Village Chairman PT Tholi chuan bawng vulh chu an sum lakluhna ber a nih thu sawiin eng nge an natna pawh an hre thei lo chunga an thi zel mai chuan an rilru a tihbuai thu a sawi a, thuneitu lamin hma an laksak vat a duh thu a sawi bawk. District veterinary joint director Dr. Sani Pao chuan food poisoning vang a nih theih thu a sawi a, an thih dan a ran em avangin tlang hri leng chu a ni thei lo tih a sawi. An enfiahna chuan heng bawng thi te hian dil pakhat tui an tlan thu a sawi a, an tui in vang hi a ni thei tih a sawi a ni. Tualchhung mite chuan hetiang thil hi a la thlen ngai loh thu an sawi a, mi ṭhenkhat chuan an ṭhenawm khuaah an bawng vulh te chu an tlattir phah a ni.