AP Congress-in Covid vanga thi data dik tak puang turin ngen

Arunachal Pradesh Congress Committee (APCC) president leh chief minister hlui Nabam Tuki chuan prime minister Narendra Modi kaihhruai sorkar chu India rama Covid-19 vanga thi zat dik tak leh rintlak puang turin a ngen.

Hripui vanga thi chhungte hnenah zangnadawmna cheng nuai li ṭheuh pe turin sorkar chu a phut bawk.

Nabam Tuki chuan, "BJP sorkarin Covid-19 hri leng a thunun theih loh leh a do dan dik tawk loh avangin mi nuai telin an tuar a, an hmangaih tak takte an chan a ni. Sorkar laipui chuan a hmaa a lo tiam tawh angin, hripui vanga thi chhungte hnenah zangnadawmna cheng nuai li a pe tur a ni," a ti. Sorkar laipui hian Covid-19 vanga thi chhungte cheng nuai li pek a lo tiam tawh chu a ennawn hnuah Rs 50,000-ah a tihniam leh tih Tuki chuan a sawi.

"PM Modi kaihhruai sorkar hian non-essential project, 'Central Vista'-ah cheng vaibelchhe 20,000 vel hman a tum laiin, hripui vanga thi chhungte hnenah Rs nuai li pek chu a inhuam leh silo a ni. Hei hian sorkar laipuiin mihring nunna a hlut dan a tilang chiang hle," a ti. Congress party chuan hri vanga nunna chan chhungte tan an bei zel dawn tih a sawi bawk. Arunachal Pradesh-ah hian Covid-19 vanga thi hi mi 280 an awm tawh.

Tuki chuan fuel leh nitin mamawh man sang zel chungchangahte sorkar laipui chu na takin a sawisel bawk.