Manipur CM ralthuam mantu secuirty force-te lawmman tur puang

Manipur chief minister N Biren Singh chuan Pathiannia Thoubal district-a helho laka beihpui thlaknaah ralthuam ṭhahnem tak mantu police team-te chu lawmman,cheng nuai 10 pek an ni dawn tih a puang.

CM Biren Singh chuan SP Jogeschandra Haobijam kaihhruai Thoubal team chu beihpui an thlaknaah Huikap Awang Leikai aṭanga mi pathum leh ralthuam thuhruk ṭhahnem tak an man avangin lawmpuina a hlan nghal bawk a ni.

Manipur police-te hian United National Liberation Front (UNLF) helte an awm thu an dawn bawhzuia Huikap Awang Leikai area-ah beihpui an thlaknaah bawng in chhunga ralthuam phum ṭhahnem tham tak an manchhuak a ni. An ralthuam mante hi AK-56 rifle 13, AK-81 leh AK-86 rifle pakhat ve ve, M-16 series assault rifle pahnih, RPG launcher leh live shell leh silai mu ṭhahnem tak a ni. Heng ralthuamte tui dahna, plaster tank chhungah dahin, hei hi bawng in chhungah an thukru a ni.