Manipur-a Jiribam-ah CrPc Section 144 puang

Manipur-a Jiribam district thuneitute chuan thuchhuah siamin kar kalta Zirtawpni aṭang khan mipali aia tam pun­khawm khapna, CrPc sec­tion 144 an district chhung­ah hman a nih thu an sawi.

State chhunga “protect the identity of indigenous people”bill dodalna a nasat avangin section 144 hi hman a nih thu an sawi bawk. Manipur People’s Protection Bill 2018, Legislative Assembly in July 23-a a pawm tharah chuan Meitei, Pangal Muslims, scheduled tribe leh midang 1951 hmalama state chhunga lut te chauh ram leilung neitua pawm an ni tawh dawn a, midang zawng chu “Non-Manipuri”-a chhiar an nih tawh dawn a ni. Heng Manipur mi ni loa chhiar te hian thla khat chhungin sorkarah an in ziahfel a ngai dawn a ni.

Hemi duh lohna lantir hian kar hmasa khan Assam-a Cachar nen an inrina lai velah mi tam tak an pungkhawm a, Bill hi Governor Najma Heptullah-i pawmpuina a la ngaih avangin Governor in a pawmpui hma hian nasa takin an dodal a ni. Joint Action Co­mmittee Against Base Year 1951 thupuangtu Md. Ahmed Ali chuan he bill hi ram danpui kalh a nih thu sawiin mi tam tak dikna chanvo palzutna a nih thu a sawi. Hemi a nih avang hian hmun pakhata mi pali aia tam punkhawm khapna dan, CrPc Section 144 hi Jeribam district thuneitute chuan an district chhungah an puang ta a ni.