Manipur zirlai ten CM bungalow luh an tum Police ten an dang

Manipur-a zirlai pawl thar Joint College Students’ Forum chuan a huhoin Inrinni khan Chief Minister bungalow luh­chilh an tum a, mahse Police-te chuan zirlaite hi an lo dang a ni.

Zirlaite hian college semester exam result ni thum chhunga tihchhuah an ngiat a, sorkar chu Manipur University buaina chungchangah beng chhu ngawng lui tlatah an puh bawk.

Forum convener Arambam Vikash chuan Zirtawpni maiah Students Forum hi din a nih thu sawiin college hrang hrang zirlai pawl ten an hmalam hun atana an beih duh avanga din a nih thu a sawi. Third, fourth leh sixth semester (graduate) exam result chu tihchhuah a la nih loh avangin zirlaite chuan fifth semseter-a an honours subject tur pawh duhthlang hleithei loin an awm tih a sawi. Post-graduate course admission tih hun tur pawh nasa takin a nghawng tih a sawi bawk.

Vikash chuan vice-chancellor Adya Prasad Pandey chu buaina chhuah chhanah puhin student welfare ngaihsak tawk loah a puh.

CM bungalow luhchilh tumtu zirlaite hi Police te chuan gate-ah lo dangin, forum aiawh tur mi ṭhenkhat chu Chief Minister N. Biren Singh lo nghak tura tih an ni. Darkar khat chuang an nghah hnu pawha an nghahchhuah theih loh avangin CM hnenah hian memorandum thehlutin university buaina chu a rang thei ang bera chingfel tur leh zirlaite hmalam hun tur chhanhim sak tura an duh thu an ziak.

Manipur Universuty hi May 30 a/ang khan khar a la ni a, VC Pandey chhuak tura nawrna avangin University hi a kal mumal thei lo a ni.

Vikash chuan Union HRD ministry leh state sorkar chu buaina chingfel tur an nih thu sawiin, VC chhuahtir chu buaina chinfelna awmchhun a nih thu a sawi.

Democratic Students’ Allia­nce of Manipur (Desam) pawhin sorkarin buaina hi a chingfel lo a nih chuan July 15 a/anga nawrh an huaihawt dawn thu an sawi ve bawk a ni.