ABPO in ramri chin hriatfiahna turin ASI leh GSI hnenah lehkha thawn

Assam Police Border Organization (APBO) chuan Assam leh a ṭhen­awm ramte zawng zawng inkarah ramri buai­na awm chu chinfel a nih theih nan ASI leh GSI hnenah lehkha an thawn.

Assam Police te chuan Archeological Survey of India (ASI) leh Geological Survey of India (GSI) hnenah hian tunhma hun-a ramri chin awm ṭhin chu hriatfiah a nih leh theih nan hma lakpui turin an ngen a, information pawimawh awm ang ang te chu hriattir turin an ngen.

APBO chuan historical relics leh thuziak te mai bakah ramri chin hriat theihna tur mumal tak a awm chuan hai­chhuah sak turin an ngen a ni.

APBO Official chuan zirchianna aṭangin history chhui dan pawh a inthlak tih hre tho mah se tunhma aṭang tawha mi zawng zawngin an pawm tlan thil a awm ṭhin a, chu chu chhuichhuak tura an duh thu a sawi. Hemi kawngah hian beiseina eng tak an neih thu sawiin, ramri inkara buaina chinfelna kawngah pawh rah duhawm tak a chhuah ngei an beisei thu a sawi.

Data tam tak pawh an lakkhawm tawh thu sawiin heng an data neih sa te hi ASI leh GSI ten an nemnghehsak a nih chuan a rintlak dawn nia sawiin mi zawng zawngin an pawm thei dawn a ni, a ti.

ABPO chuan Assam chuan Meghalaya nen km. 884.90 ramri an in/awm tih an sawi a, Arunachal Pradesh nen km. 804.10 in/awmin, Nagaland nen 512.10 an in/awm tih an sawi bawk. Manipur nen km. 2014, Mizoram nen km. 164.60 leh Tripura nen km. 46.30-ah a thuiah an inri thu an sawi a ni.

Assam Police Official chuan heng an inrina zawng zawngah hian Nagaland nen an inrinaah buaina a chhuak nasa ber tih sawiin, nunna chan phah pawh state lehlam lehlamah hian an awm nual tawh tih a sawi bawk. Supreme Court chuan ramri chungchang hi ngaihtuah reng tho mah se ramri chungchanga inremna tluantling an duh thu a sawi a ni.