APSC Scam Case: Excise inspector thu zawtfiah

Assam Public Service Commission (APSC)-a thamna pek avanga hna lak chungchanga buaina kal zelah kar hmasa khan Excise inspector Abhishek Borbora chu Enforcement Directorate (ED) in Guwahati-a central jail-ah thu an zawtfiah.

Borbora hi thubuaiah hian man a lo ni tawh a, Dibrugarh Police-ten an chhuichianna aṭangin he buaina kaihhnawihah hian pawisa tam tham tak phurh nan lirthei paruk lai hman niin an hria a, ED hian hemi chungchangah hian thubuai pawh an ziaklut tawh nghe nghe a ni.

Hemi avang hian Borbora hi thu an zawtfiah a, ani bakah hian official dang pathum- district transport officer Prasenjit Kumar Ghosh, assistant employment officer Satyajit Sarkar leh deputy superintendent of police Kaushik Kalita-te pawh thu an zawtfiah leh dawn niin ED chuan an sawi.

Police-te chuan an chhuichianna aṭangin pawisa phurh kual a nih dan hi an hriatchhuah theih an rin thu an sawi.

ED hian he case kaihhnawihah hian mi hrang hrang thu an lo zawtfiah nual tawh a, APSC chairperson hlui Rakesh Paul, APSC member suspend mek Samedur Rahman-te pawh thu an lo zawtfiah tawh bawk a ni.