NRC hi Assamese ni lo te dodalna a ni: Citizens’ Rights Protection Committee

Citizens’ Rights Protection Co-Ordination Committee chuan thuchhuah siamin Assam-a NRC kalpui mek chu Assam mi ni lo te umchhuahna tur a nih thu an sawi.

Citizens’ Rights Protection Co-Ordination Committee chuan National Register of Citizen(NRC) chu Assamese ni lo umchhuahna tura hmalakna a nih thu sawiin, a bik takin Barak Valley-a Bengali-te hnawhchhuahna tur a nih thu an sawi a ni.

NRC hi Assam-ah hian kalpui mek a ni a, hun rei tak ata buaina awm tawh, ramdang mi state chhunga an awm avanga buaina awm chinfelna tura tih a ni. Draft list hmasa ber chu nikum De­cember 31 zanlaiah khan tihchhuah a ni tawh a, July 30 hian draft list pahnihna tihchhuah leh a ni ang.

Committee member Kishore Bhattacharjee chuan NRC chung­changa hmalakna kalpui mek a nih dan aṭang chuan Assam mi ni lo, a bik takin Bengali te umchhuahna tur a ni tih a chiang hle niin a sawi.

Barak Valley-a hming tam zawk chu list hmasa zawkah an lang lo tih sawiin 20-35% hming chiah a lang tih a sawi a, hemi a nih avang hian ruahman lawkna awmsaa, tum nei rana thilti an nih thu a sawi bawk.

Bhattacharjee chuan ram mi dik tak te chu NRC-a ziahluh an nih theihna turin hma an la zel dawn tih a sawi a ni.

Katigorah legislator hlui leh committee member, Ataur Rahman Mazarbhuiya pawhin NRC chu an dodal loh thu sawiin inthliarhranna awm erawh tihtawp a ni tur a ni, ati.

Mazarbhuiya chuan NRC chu Barak leh Brahmaputra valley thliarhranna tur nia a lan avangin mipuite a tichiai niin a sawi. Sorkar chu boruak muanawm siam turin a ngen bawk a ni.

ULFA hruaitu Jiten Dutta-an ualau taka Citizenship (Amen­dment) Bill, 2016 pawm a nih chuan pawikhawihna an thlen ang tia a sawi chunga sorkarin action an la lo chu mak a tih thu a sawi bawk.

Dutta hian tunhnai lawk khan Barak Valley-a a kaihhruai tam tak te nen bill dodal tur hian an penchhuak dawn niin a sawi a, mahse committee chuan hei hi insawiṭhaihna mai nia an ngaih thu an sawi thung.

Citizens’ Rights Protection Co-Ordination Committee-ah hian Bengali, Meitei, Dimasa, Naga, Hindi ṭawng hmang te leh Bishnupriya community aiawh te an tel a ni.