Manipur University office hal

Manipur University-a assistant director of sports office chu Inrinni zan khan mi tu tih hriat lohin a hal.

University Vice Chance­llor Adya Prasad Pandey chhuak tura nawr a nih mek laia thleng ni mah se zirlai pawl lam chuan an tih a nih loh thu an sawi thung.

Manipur University Students’ Union (Musu) president M. Dayaman chuan an nawrh huaihawt dan chu boruak muanawm zawng a nih thu sawiin pawikhawih zawnga nawrh an buatsaih ngai loh thu a sawi. Inrinni zana office hal pawh chu an nawrh tihbahlah tumna a nih thu a sawi bawk.

Varsity-a zirlai pawlte leh zirtirtute hian Vice Chan­cellor hi chhuakṭ turin nasa takin an nawr a, adminis­tration kalpui ṭha loa puh a nih bakah sum leh pai hman dan chungchangah pawh dik lo taka sum hmanga puh a ni. Zirlaite chuan VC hian a office chu night club ang maiin a hmang niin an puh bawk a ni.

Sports department leh varsity indoor stadium hi a inzawm a, kang ṭhelhna in office kang hi ṭhelh ni mah se office bungrua erawh senghawi hman a ni lo a, hmundang a kangkai tur erawh dan hman a ni thung.

Zirtirtu, staff-te bakah zir­laite chuan indoor sta­dium hal tumna chu an dem thu an sawi. Manipur Univer­sity Students’ Union (MUSU), Manipur Univer­sity Teachers’ Associa­tion (MUTA) leh Manipur University Staffs’ Association (MUSA) te chuan kangmei chhuak chu an nawrh huaihawt mek tihbahalh tumtute thiltih a nih thu thuchhuah an siam nghal bawk.

Hetih lai hian MU hnuaia college hrang hrang zirlai pawl te chuan Chief Minister N. Biren Singh hnenah an result a chhuah theih loh avangin Inrinni khan memoran­dum an lo thehlut ve bawk a ni.

University VC chhuak tura nawrna hi May 30 aṭang khan neih a ni tawh a, tun thleng hian an la hlawhtling lo a ni.

Sports office hal a nih avang hian Inrinni zingah khan pawl pathumte hian mee­ting an nei nghal bawk.