Assam: Majuli-ah India amphibious aircraft hmasa ber service dawn

Khawvela river Island lian ber, Assam-a Brahmaputra-a awm Majuli-ah India rama amphibious aircraft hma­sa ber service tir a ni dawn a, hma lak mek a ni.

Amphibious aircraft hi thlawhtheihna lian vak lo, tui leh khawmual-a ṭum kawp thei a ni a, khawthlang ho chuan an hmang uar tawh hle a, India ramah erawh Majuli-ah hian service tir a nih chuan a hmasa ber a ni thung ang.

Airport Authority of India (AAI) leh SpiceJet thuneitute chuan kar hma­sa Ningani khan Maju­li hi an thleng tawh a, Guwahati-Kaziranga-Majuli inkara service tir theih a nihna turin an enfiah niin report chuan a tarlang.

Amphibious aircraft, seaplane an tih bawk hi SpiceJet in an operate dawn a, Japan ramah thlawh­theihna hi chu siamtir a ni thung dawn a ni.

AAI bakah hian Di­rector General of Civil Aviation (DGCA), Spice Jet Airline, India Meteorological Depart­ment (IMD) leh State Water Resources Department-te chuan thlawhtheihna kalpui a nih dan tur leh ṭumtir a nihna hmun tur te an la zir ho dawn niin report chuan a tarlang bawk.

Kar hmasa khan Sangeeta Mahay, GM (Arch), AAI kaihhruai team leh Majuli De­puty Commissioner Debaprasad Misra ho in DC Office Conference Hall-ah hemi chungchang hi sawi hoin meeting an nei tawh bawk a ni. He hunah hian official pawimawh mi eng emaw zat pawh an tel bawk a ni.