Tripura tribal party-ten Greater Tipraland phutin nawrh huaihawt

Tripura-a tribal party pahnihte chuan Thawhlehni khan “Greater Tipraland” siam phutin Delhi-ah nawrh an huaihawt. Nawrh huaihawt zingah hian rorellai, BJP thawhpui Indigenous People’s Front of Tripura (IPFT) an tel.

IPFT leh Pradyot Bikram Manikya Deb Barman kaihhruai TIPRA (Tipraha Indigenous Progressive Regional Alliance) hian Delhi-a Jantar Mantar-ah nawrh hi huaihawtin, nimin khan an chhunzawm a ni.

Tribal party pahnih member-te an tel ṭha hle a, Congress Rajya Sabha member Jairam Ramesh leh Shiv Sena MP Priyanka Chaturvedi-te pawhin an telpui.

TIPRA thupuangtu Kamal Koloi chuan an thil phut chungchangah union home minister Amit Shah hmuh tumin ruahmanna an siam a, mahse Prime Minister Office chuan PM Narendra Modi chuan amah ngeiin tribal hruaitute hi hmuh a duh thu a hrilh niin a sawi.

Deb Barman chuan Tripura leilung fate culture leh customte humhalh a, hmasawnna rualkhai tak a awm theihna turin 'Greater Tipraland' siam a ngai a, India ram danpui hnuaiah a siam theih a ni, a ti. 'Greater Tipraland' hnuaiah council chak tak siamin, hemi hmang hian hmarchhak state dang zawng leh ṭhenawm ram Bangladesh-a tribal chengte tan hmasawnna a thlen thei dawn a ni, a ti. Hetiang council hi Europe ramah te pawh an din a, tribal-ten harsatna neih ṭhin chinfel chu an duh leh tum ber a nih thu a sawi a ni.

Hetih lai hian national party tam zawk chuan 'Greater Tipraland' siam hi an duh lo a, an zingah hian BJP, CPI-M leh Congress pawh an tel.