AASU hruaitu thihnaa mawhphurtu zinga puh Police kut aṭanga a tlanchhuah hnuah a thi

Assam police-ten Jorhat khuaa All Assam Students' Union (AASU) hruaitu Animesh Bhuyan sawisak hlumnaa inhnamhnawiha puha an man, Neeraj Das chu Thawhlehni zan khan police-te kut aṭanga a tlanchhuah hnuah, Jorhat-Mariani road-ah motor-in a sut vangin a thi.

Kum 23 mi, AASU hruaitu Bhyan hi Thawhṭanni tlai khan Jorhat-a motor chesuala hliam tuar pakhat puih an tum laiin mipui pungkhawmten an bei a, mi dang pahnih nen hliam na tak an tuar a, damdawi-in panpui an nih laiin Bhyan hi a thi a ni.

He thil thleng avang hian AASU chuan police-te chu Bhyan leh midang kutthlaktute man tura phutin, darkar 24 chhung man an nih loh chuan Jorhat khuaah bandh huaihawt an tum a ni.

Thawhlehni zan khan Assam police-te chuan pawikhawihna thlenga inhnamhnawiha puh mi 12 te an man a, an zingah hian Neeraj Das pawh hi a tel a ni. Mahse Das hi police motor aṭanga tlanchhuakin, tlanchhiat a tum chu an hnunga police motor dang lo tlan chuan ding hman loin a su ta a ni. Motor chetsual vang hian police pathumin hliam an tuar bawk.

Neeraj Das hi Jorhat Medical College and Hospital panpui ni mah se, a hliam tuar loin a thi a ni. Das hi ruihhlo lama sumdawnnaah pawh a inhnanhmawih nia sawi a ni bawk.

Chief minister Himanta Biswa Sarma chuan Jorhat khuaa AASU hruaitu leh midangte beihna thleng chu a dem thu sawiin, pawikhawihtute chu man chhuaha hremna pek ngei an nih tur thu a sawi. He pawikhawihna thlenga inhnamhnawihte laka ni 30 chhung ngeia chargesheet thehlut turin police-te a hriattir.