Meghalaya Congress working President a bang

Meghalaya Pradesh Congress Committee (MPCC) chhunga buaina kal zelah, party hruaitu hlun pahnihte chuan Nilaini khan party aṭanga banna an thehlut ve leh ta. Hemi hma hian Congress MLA 12-te chuan an party chhuahsanin Trinamool Congress an lo zawm tawh a ni.

Congress party aṭanga banna thehlutte hi MPCC working president James Lyngdoh leh MPCC Labour department chairman Dr Manash Gupta-te an ni.

James Lyngdoh hi Congress party-ah hian kum 33 zet awm tawhin, party president atana ruat thar Vincent Pala kaihhruai MPCC team-ah pawh a tel a ni. Sonia Gandhi hnenah banna lehkha a thehluh hnuah, Lyngodh chuan state chhunga mipuite rawngbawl hna thawk thei tura mawhphurhna leh hun ṭhate pek a ni chu a lawm thu a sawi. A awmdan zel tur erawh a la sawichiang lo.

Dr Manash Das Gupta hi party hruaitu hlun niin kum 36 zet a lo awm tawh bawk a, tun hnaia party hruaitute siksawi a nih hma khan party general secretary-ah kum 14 a lo awm tawh a ni.

Congress party chuan Thawhṭanni khan Congress party aṭanga Trinamool Congress zawmtu MLA 12-te disqualify phutin Assembly Speaker Metbah Lyngdoh an lo hmu tawh bawk. TMC zawmtu zingah hian chief minister hlui Mukul Sangma pawh a tel.

Speaker chuan nimin khan Mukul Sangma hnenah Congress Legislative Party (CLP) Leader Dr Ampareen Lyngdoh-i'n Congress MLA hlui 12-te disqualify tura ngenna a thehluh chungchang chu chhang tura hrilhin, ni sarih hun a pe.

Congress Legislature Party leader hlui, Mukul Sangma hi central lama party hruaituten August thlaa state Congress president atana Shillong MP Vincent Pala an ruat avangin a lungawi lo a ni. Garo Hills-a Vincent Pala leh working president atana ruat tharte chawimawina inkhawm buatsaihah pawh Sangma leh amah thlawptu MLA eng emaw zat chu an tel duh lo a ni. Party chhunga a lungawi lohna kal zelah, amah thlawptu MLA 11-ten Congress chhuahsanin TMC an zawm ta a ni. Hetih lai hian Congress chuan Sangma hi North East Co-ordination Congress Committee chairman atan ruat a ni chungin, hun rei tak chhung chu party tan hian tha a thawh ṭha duh tawh lo niin an sawi thung.