Sikkim-ah ram dang mi luh khap

Covid-19 variant thar, Omicron variant a darh chhoh leh mek avangin Sikkim state chuan he hri darh tur laka lo invenna atan, December 1 aṭang khan state chhungah ram dang mi luh a khap.

Home department chuan hemi chung­changah hian thuchhuah siamin, an state tlawh tum ram dang mite hnena Inner Line Permit (ILP) pek ṭhin chu tihtawp a ni rih dawn tih sawiin, he khapna hian December 16 thleng a huam phawt tur thu a sawi.

Hetih lai hian he khapna hian India ram chhung hmun dang aṭanga lut turte erawh a huam lo a, mahse Sikkim kal turte chu vaccination certificate keng tura tih an ni. Covid-19 vaccine dose khatna tal la tawh leh naupang kum 18 hnuai lamte luh phalsak an ni.