Assam-Meghalaya border : Regional committee 2-in report peih fel tawh

Assam leh Meghalaya ramri buaina chinfel dan tur buaipui tura Meghalaya sorkarin regional committee a din zinga pahnih chuan report an peihfel tawh a, Meghalaya chief minister Conrad K Sangma hnenah an thehlut thuai dawn tih an sawi.

Report peihfel tawhte Ri-Bhoi district leh West Khasi Hills district regional committee-te an ni. East Jaintia Hills district regional committee erawh chuan report thehluh nan hian hun pek belh a dil thung.

Regional committee pathum hi kumin September thla khan state sorkarin Assam nena ramri buaina an neih zinga hmun paruk enfiah leh, buaina chinfel an ngaituah tura a dinte an ni. A thawh khatna atana state pahnihte ramri buaina chinfelna tura hma an laknate hi West Khasi Hills-a Tarabi, Gizang leh Hahim te, Ri Bhoi district-a Boklapara leh Khanapara-Pilingkata leh East Jaintia Hills district-a Ratacherra hmunte an ni.

Ri-Bhoi district regional committee hotu, deputy chief minister Prestone Tynsong chuan nimin khan committee member-te chuan final report hi an enfiah tih a sawi. Mahse report-a an tarlante erawh a sawi lang lo a, chief minister hnenah thehluh hunah ani hian a sawichhuak dawn a ni, a ti.