Manipur-in zin veivahna kaihhruaina thar siam

Manipur sorkar chuan ram hrang hrangah Covid-19 hri chi thar, Omicron variant a darh leh avangin venthawn thilah zin veivahna lama kaihhruaina thar a siam.

Sorkarin kaihhruaina thar a siamah hian state pawn lam aṭanga Manipur lut turte chuan online Air Suvidha portal-ah an zin hmain self-declaration form an thehlut a ngai a, ni 14 liam ta chhung an zin leh kalna hmunte an tarlan tel vek a ngai a ni. Manipur an luh hma darkar 72 chhunga RT-PCR hmang an in test-na, negative Covid-19 report pawh an upload tel a ngai bawk.

Khualzinte hi Imphal airport an thlen hunah test leh vek an ni dawn a, Covid-19 negative an nih chauhin an kal chhuah phalsak an ni ang. Manipur an thlen aṭanga ni riat hnuah test an ni leh bawk ang.

Health director Dr K Rajo chuan tun kar chhungin Covid-19 variant hmuhna ram, 'at risk'-a dah ram aṭangin khualzin pariat an state-ah an lut tawh tih a sawi. Mahse heng khualzinte hi test-naah an negative vek a, home quarantine mek an ni, a ti.