Chakma leh Hajong-te chhiarpui neih turah PM inrawlh turin ngen

Chakma Develop­ment Foundation of India (CDFI) chuan Arunachal Pradesh-a December 11 aṭanga Chakma leh Hajong hnam bik chhiarpui neih tum chu dan kalh nia sawiin, prime minsiter Narendra Modi leh RSS hotu Mohan Bhagwat-te chu inrawlh turin a ngen.

November 26 khan Changlang district-a deputy commissioner chuan hriattirna tichhuakin, Chakma/Hajong chenna bial chhungah chhiarpui nei tur leh, December 31,2021 hmaa sorkara report thehlut turin a ti a ni.

He chhiarpui neih turah hian Chakma/Hajong hnamte chu an bank account, hna thawh leh criminal case an nei em tihte, Bengal Eastern Frontier Regulation 1873 hnuaiah Inner Line Permit (ILP) system an bawhchhia em tihte pawh telh vek tura tih a ni bawk.

CDFI hruaitu Suhas Chakma chuan hetianga Chakma leh Hajong hnam bik chhiarpui neih tum chu chi inthliarna nasa tak a ni tih sawiin, Arunachal Pradesh chu China leh Myanmar nena an inri avangin heng ram aṭang hian dan loa lut mi tam tak an awm bawk a ni, a ti. Hei bakah Inner Line Permit nei loin state chhung hmun tam takah inbengbel an awm a, hetih laia state sorkarin Chakma leh Hajong hnam bik a thliar hrang chu India ram danpui leh International Convention on the Elimination of Racial Discrimination bawhchhiatna lian tak a nih thu a sawi.

Chakma leh Hajong hnam chu kum 1964-1969 khan India ramah an awm tawh a, hei vang hian Bengal Eastern Frontier Regulation of 1873 hnuaiah ILP an neih vek kher a ngai lo tih Chakma chuan a sawi bawk. State chhungah hnam dang, ILP pawh nei loa hnam dang tam takte laka action la duh loin, ILP ngai ve lo Chakma leh Hajong-te chu state sorkar chuan a bitum tlat a ni, a ti.