Union HM in digital connectivity hmasawnna tur roadmap siam turin NEC ti

North Eastern Council 67th Planery Session Thawhṭanni leh Thawhlehni-a neihah khan Union Home Minister Rajnath Singh chuan NEC chu digital connectivity leh broadband facility-a hmasawnna nasa tak a awm theihna tur roadmap siam turin a ti.

Rajnath Singh hian State Convention-a meeting neih zawh hnuah hian a Twitter-ah hmarchhak state-te chuan highway an mamawh thu sawiin I-way pawh an mamawh hle niin a ziak. Singh chuan inkalpawhna ṭha neihna turin Information Technology pathway mamawh a nih thu a sawi bawk.

Union Home Minister chuan inkalpawhna ṭha a awm hunah hmarchhakin economic hmasawnna tura theihna a neih te chu hriatchhuah tak tak a ni chauh ang, a ti.

Rajnath Singh chuan broad­band quality ṭha tak hmarchhakah pek theih a nih chuan hmarchhak ṭhalaite chuan an bulhnaiah hna ṭha zawk an hmu thei dawn niin a sawi a, hmun hla tak taka ṭhalai ten hna an zawn a ngai tawh dawn lo a ni, a ti bawk.

NEC Planery session chung­chang a sawinaah Rajnath Singh chuan employment leh income generation chu hmarchhaka ngaihpawimawh ber tur a nih thu a sawi. Private investor te thlamuang taka an awm theina tur boruak siam a pawimawh thu sawiin hei hian investment lamah hmasawnna nasa tak a thlen dawn a ni, a ti.

Skill development lamah pawh hmarchhak chuan ṭan lak a mamawh thu sawiin ITI leh Polytechnic te chuan he kawngah hian hma nasa zawka la turin a ti a ni.

Hmarchhaka chief minister zawng zawng te chu rintlak taka an awm a pawimawh thu sawiin an rorelna pawh langtlang tak nise a tih thu a sawi. Dan leh thupek ṭha taka kalpui chu hmarchhak chuan a tum tur a nih thu sawiin infrastructure hmasawnna kawngah chuan sorkar laipuiin a theihtawpa a ṭanpui tur thu a sawi.

Hmarchhak state te chuan theihna hrang ṭheuh an neih thu sawiin heng an theihna hrang hrang neihte hi haichhuah a pawimawh thu a sawi a ni.

Singh chuan ‘New India’ chu ‘New North East’ hmathlira neih a nih hunah chiah hriatchhuah a ni ang, a ti.

NEC Planery Session-ah hian hmarchhak governor leh chief minister te bakah Vice Chairman Jitendra Singh-te pawh an tel a, official pawimawh eng emaw zat an tel bawk a ni.