Assam Chief Minister in Islamic radical force dolet tura thawhho a ṭul ti

Assam Chief Minister Sar­bananda Sonowal chuan hmar­chhak state zawng zawng te chu Islamic radical force doletna kawnga an thawhho a ṭul thu a sawi.

North Eastern Council (NEC) 67th Plenary Session neiha thu a sawinaah Islamic radical force-te hmarchhakah an hluar hle tih report a awm thu chu sawilangin, hmarchhakah an pun nasat thu a sawi a, hemi a nih avang hian venhimna ṭha tak a awm theih nan state hrang hrang bakah ramdang thleng pawhin an thawhho a ṭul tih a sawi a ni.

Sonowal chuan state pakhata hel laka beihpui thlak a nih chuan hel te chu state hranah leh ramdangah thleng pawh an tlanchhuah ṭhin thu a sawi.

Assam CM chuan session a kal Governor leh Chief Minister zawng zawng te chu hmarchhaka venhimna chak zawka kalpui a nih theihna tura thawhho puiah a sawi a ni.

Sonowal-a sawmna hi Thawh­lehni khan CM leh Governor-te chuan an pawmpui thu sawiin, thawhho chu thil pawimawh tak a nih thu an sawi bawk.

Meghalaya Chief Minister Conrad K. Sangma pawhin Thawh­lehni khan venhimna kaih­hnawihah chuan eng pawl mah thliar bik awm loin hmarchhak state zawng zawngte chu an ṭan­rual a pawimawh thu a sawi a, thu hriat tur te pawh an inhrilhtawn a pawimawh thu leh NEC chu a sawina tur hmun diktak a nih thu a sawi.

Manipur Governor Najma Heptulla pawhin ramri-a ruihhlo leh ralthuam tawlh ruk ṭhin dona kawngah pawh hmarchhak state zawng zawng chu an thawhho a ṭul hle tih a sawi ve bawk.

Union Home Minister Rajnath Singh chuan Planery session-ah hian hmarchhakah hian 90's ngaih­tuah chuan helna 85% in a tlak­hniam thu a sawi a ni.