Nagaland-ah sipaite'n civil mi 13 kap hlum ; Mipui thinrimin sipai motor an hal sak

Nagaland-ah kar liam ta Inrinni khan security force-ten civil mi 13 an kap hlum.

He thil thlenna hi Mon district-a Oting khaw bul, Tiru-Oting road-ah a ni. Assam Rifles sipaite chuan hel an awm nia thu an dawn bawhzuiin kawngpuiah hian an lo chang a, lungalhthei khura thawk mi 30 chuang phurtu truck chu helho phur nia ngaiin an lo kap a, mi paruk an kaphlum a ni.

Security force-te thiltih an hriat veleh Oting khaw mite chu kalkhawmin Assam Rifles camp an hual nghal a,an motor-te an halsak bakah sipaite hi an bei zui nghal bawk a ni. Sipaite hian lo bei zuiin, an inbeihnaah civil mi pasrih leh sipai pakhat an thi niin official chuan a sawi. Hliam tuar pawh eng emaw zat an awm nia sawi a ni.

Indian army chuan Nagaland-a thil thleng hi pawi a ti takzet tih sawiin, chhui chiang turin thupek tihchhuah nghal a nih thu nimin khan a sawi. Civil mite thih dan chu Court of Inquiry-in a chhui dawn a, dan ang takin a ṭul anga hma lak a ni dawn tih thuchhuah siamin a tarlang.

Defence minister Rajnath Singh leh Indian Army chief General MM Naravane hnenah pawh he thil thleng chungchang hi hrilh a ni tawh bawk.

Union home minister Amit Shah chuan security force-ten civil mi eng emaw zat an that chu pawi a ti hle tih sawiin, he vanduaina thlenga nunna chan chhungte a tawrhpui thu leh, state sorkarin a din Special Investigation Team (SIT) chuan thil thlen dante chiang tak chhuiin, dik taka rorel a ni dawn tih a sawi.

Nagaland chief minister Neiphiu Rio chuan Oting khaw bula civil mi tam tak thah a nih chu an dem thu sawiin, thi chhungte an tuarpui thu leh, hliam tuarte an dam leh thuai an duhsak thu a sawi. High-level SIT hi thil thlen dan hi a chhui dawn a, dan ang takin ro rel a ni ang, a ti. Mipuite chu inbengdai a, boruak muanawm siam turin a ngen nghal bawk.