AP-ah special census nei tura thutlukna siam la awm lo

Chakma organisation-in Arunachal Pradesh-ah Chakma leh Hajong hnamte chhiarpui neihsak tum a nih thu leh, prime minister Narendra Modi inrawlh tura an ngen chungchangah state thuneitute chuan special census kalpuina tura thutlukna siam engmah a la awm loh thu an sawi.

Delhi-a Chakma Development Foundation of India (CDFI) chuan Changlang district-ah Chakma leh Hajong hnam bikte chhiarpui neih tum a ni a, hei hi chi inthliarna a ni tiin, PM Modi bakah RSS hotu pawh hemi chungchangah hian inrawlh tura ngenin kar liam ta khan thuchhuah pawh an lo siam tawh a ni.

Mahse Changlang district thuneitute chuan he thil hi rawt a la ni chauh a, chhiarpui nei tur hian thutlukna siam engmah a awm lo, kalpui mai pawh tum a ni lo tih an sawi.

Changlang district deputy commissioner, Devansh Yadev chuan engmah tihfel leh thutlukna siam a awm lo a, hetih laia hmei chungchanga boruak lo siam an awm chu thil tul lo tak a ni,a ti. Rawtna awm mah se thutlukna siam hmain stakeholder zawng zawngte an be phawt dawn tih a sawi bawk.

Yadev chuan, "Hetiang chhiarpui hi kum 2010 leh 2015 khan neih a lo ni tawh a ni. Hengah hian tualchhunga Chakma leh Hajong-te chuan buaina an neih loh laiin, state pawn lama pawlte chu an lo buai zawk a ni," a ti.