Covid-19 : Hmarchhak dinhmun

Arunachal Pradesh-a Covid-19 kai hmuh chhuah chu nimin thleng khan mi 91 an tling tawh. 

Pathiannia sample 386 endik zingah hri kai pathum hi hmuh belh an ni a, an pathum hian Delhi aṭanga haw vek niin, quarantine centre-a awm lai an ni. Hri kai tih hriat an nih hnuah Covid19 Care Centre (CCC) ah enkawl tura sawn nghal an ni a, asymptomatic vek an ni a, an ngaihtuahawm lo tih health department chuan a tarlang. 

Upper Siang-a CCC-a enkawl, hri kai pakhat chu Pathianni khan enkawl dam a nih tawh avangin chhuah tir a ni a, hri  kai enkawl dam hi mi pasarih an awm tawh a ni. Hri kai hmuh tawh hi hmeichhia 35 leh mipa 56 an ni. 

All Arunachal Pradesh Students' Union (AAPSU) chuan an state-a Covid-19 kai an pun zel chuan district level emaw, state level emawin bandh an huaihawt mai tur thu an sawi. Hei bakah hri kai an pun chhoh mek laia state chhunga zirna inte hawn an duh loh thu sawiin, state sorkar hnenah August 31 thleng school leh college-te khar an la ni dawn tih thuchuah siam turin an phut bawk. 

Assam health minister Himanta Biswa Sarma chuan an state-ah Covid-19 kai  hmuh chhuah belh, Pathianniah mi 69 leh niminah mi 40 an awm tih sawiin, heng mite nen hri kai hmuh tawh hi mi 4,158 an tling tawh tih a sawi. 

Hri kai hmuh tawh zinga 1,960 chu enkawl dam an ni tawh thung a, enkawl mek mi 2,187 an awm. 

Kar liam taa Guwahati-a gas cylinder a ruk avanga police-ten an man, mi pakhat chu Covid-19 a kai tih  hriat chhuah a ni a, hei vang hian a mannaa tel police 11 te chu inkhung hran tir nghal an ni. 

Guwahati Central Jail-ah hri kai an awm avangin he hmun hi containment zone-ah puan a ni tawh bawk a, jail-a tangte swap sample pawh endik turin lak a ni tawh a ni. 

Manipur-ah nimin khan hmuh belh an awm lo a, hri kai hmuh tawh hi mi 458 niin, an zinga 91 chu enkawl dam an ni tawh. 

Chief minister N Biren Singh chuan an state-ah hri kai hmuh belh zel ni mah se, mipuiah he hri hi a la darh lo tih a sawi. Hri kai pun chhan pakhat pawh quarantine centre-a awmte fimkhur tawk loh vang leh, sorkar dan siamte an zawm ṭhat tawk loh vang a ni tih a sawi. 

Hri laka invenna kawng khat atan mipuite chu pawnchhuahnaah hmaituamna vuah ziah tura tih an ni a, a vuahlote chu thubuai siamsak zel an nih tur thu CM chuan a sawi bawk. Sorkar office-ah pawh thawktute chu hmai tuamna hmang vek tura tih niin, office building pawnah hmaituamna vuah a ṭul thu ziahna te dah tur tih an ni. 

Official meeting-ah pawh a telte chuan hmaituamna an vuah vek tur tih a ni a, office-ah pawh hmaituamna vuah loh chu luhtir lo tura tih an ni bawk. 

Meghalaya-ah hri kai hmuh thar an awm lo a, hri kai enkawl  zinga pathum chu Pathianni khan an enkawl dam an ni. 

Hri kai enkawl dam tawh hi mi 26 an awm tawh a, enkawl  mek mi 17 an awm. 

Meghalaya-a Covid-19 kai zinga pakhat chuan NEIGRIHMS hospital-ah kar liam ta Inrinni khan nau a nei a, naute leh a nu pawh an dinhmun a ṭha niin official-te an sawi. Health minister Al Hek chuan hospital-ah ni 15 quarantine an nih hnuah nu leh naute hi an sample test leh a ni dawn tih a sawi. 

Deputy chief minister Prestone Tynsong chuan state dang aṭanga haw tur an la awm thu a sawi a, mahse heng mite tan chuan sorkarin a hranin special train a ruahman tawh dawn lo tih a sawi. Mahse Guwahati aṭanga Meghalaya panna tur bus erawh chu sorkarin a ngaihtuah sak thung ang.

Nagaland-ah nimin zing khan hri kai mi pakua hmuh chhuah belh an ni. Hri kai hmuh tawh hi mi 177 an tling tawh a, an zinga mi 88 chu enkawl dam an ni tawh bawk. 

Health minister S Pangnyu Phom chuan Pathiannia sample 418 endik zingah mi pakuate an positive tih sawiin, an zinga panga chu Dimapur quarantine centre-a mi niin, pali chu Peren-a quarantine centre-a awm an ni tih a sawi. 

Principal secretary (Home) Abhijit Sinha chuan an state-ah sample 5,945 test a nih tawh thu leh, sample 1,097 result nghah mek a nih thu a sawi. Hri kai kai enkawl mek zinga mi 80 chu an taksaa natna nei lo, asymptomatic an nih thu a sawi bawk. 

Sikkim-ah hri kai hmuh chhuah tawh chu mi 63 an tling tawh a, an zing pali chu enkawl dam an ni tawh thung. 

Sikkim hi hun eng emaw chen Covid-19 kai awm lohna state a nih hnuah, May 23 khan state dang aṭanga haw zinga he hri kai hi hmuh hmasak ber a ni. Hemi hnu hian hri kai hi hmuh chhuah belh zel niin, an vai hian state danga tangkhang haw vek an ni. Kar thum chhungin hri kai hi mi 63-ah an tling chho hman a ni. 

Health secretary Dr Pempa Bhutia chuan state danga tangkhang, haw tur an awm belh tawh loh avangin hri kai hi an pun chhoh a rinawm tawh loh thu a sawi. An state-a kir tur awm pawh Sikkim mi ni lo, an state-a lehkha zir leh sorkar hnathawkte an ni a, mahse zirna in te August 1 thleng khar a la nih dawn avangin state border-te pawh khar chhunzawm zel a ni dawn tih a sawi a ni. 

Bhutia chuan damdawiin lama thawktute pawh test neih sak zel an ni tih sawiin, Covid Ward-a duty doctor, nurse leh paramedic mi 34-te chu kar khat an duty hnuah kar hnih chhung inkhung hran tir zel an ni tih a sawi bawk.