AP: Longding district-ah NSCN-IM pahnih kaphlum

Arunachal Pradesh-a Longding district-ah Nilaini khan security force-ten NSCN-IM mi pahnih an kaphlum.

Kohima-a Defence PRO Col C Konwer chuan Sonya Noksa thingtlang khuaah NSCN hel pawl te an awm nia an thudawn bawhzuiin Dao Division kaihhruaina hnuaiah security force-te chuan Nilaini khan beihpui an thlak tih a sawi a, khua an thlen hian in pakhat aṭangin silai an rawn hmehpuah thu sawiin security force-te chuan an kaplet ve nghal niin a sawi. Security force ten an kahletnaah hian hel pawl mi pahnih an kaphlum tih a sawi bawk.

PRO chuan an mi kahhlum te ruang bulah hian AK series rifle leh pistol an chhar thu a sawi a, an mi thah te hi tute nge tih erawh police-te chuan an la tarlang duh lo niin a sawi.

Hetihlai hian Ningani khan Khonsa (Tirap) battalion Assam Rifles (AR)-te chuan NSCN(R) hel pawl mi pakhat Khonsa khuaah an man ve bawk.

An mi man kut aṭang hian silai mu, pawikhawihna lehkha leh phal loh thil eng maw zat an man a ni. Thu an zawhfiahnaah an mi man hian 2015 aṭang khan NSCN(R) hi a zawm niin an sawi.