Assam cash-for-jobs scam: Sorkar official 19 koh an ni

Assam-a Dibrugarh police-te chuan thamna pek avanga hna hmuh case kalzelah Pathianni khan state sorkar official 19 te chu thu zawhfiah turin an ko.

Assam Public Service Commission(APSC) scam thubuai kalzelah Assam Civil Service officer 13 koh an ni a, anni bakah hian state police official pathum koh an ni bawk. Heng an koh zingah hian Tezpur MP Ram Prasad Sarmah fanu Pallavi Sharma pawh a tel a ni. Anni bakah hian superintendent of taxes, inspector of tax leh Kamrup (metro) district transport officer Suranjita Hazarika te pawh an te pawh an tel a ni.

Dibrugarh police in an koh te hi Naktuk chawhma dar 10-ah hian Guwahati-a special branch (SB) headquarter-a inlan tura hriattir an ni bawk.

APSC scam chhuitu zinga a kaihruaitu ber pawl Dibrugarh, Additional superintendent of police, Surjeet Singh Panesar chuan heng officer-te hi an answer paper-ah thil fel lo an hmu tih sawiin, handwriting test an nei dawn tih a sawi. Panesar chuan heng official te hian 2014 khan Combined Competitive Examination-14 an pe nia sawiin 2016 khan appointment pek an nih thu a sawi.

An koh zinga mi DTO Suranjita Hazarika erawh chuan media kaltlangin koh zingah a tel tih a hriat thu sawiin, kohna lehkha erawh a dawng lo tih a sawi a ni.

February thla pawh khan sorkar official pakua chu handwriting test nei tura koh an lo ni tawh.

APSC scam-ah hian sorkar official 44 vel lai man an ni tawh a, pahnih chu zawn mek an ni bawk. Heng zinga 36 hi ACS officer an ni a, APSC officer pathum, personal security officer pakhat leh engineer bakah clerical staff te pawh an awm a ni.